Многу млади лица го користат летниот период за да поминат одмор и при тоа да заработат. Најчестите коментари зошто младите лица одат да работат во туристички места, хотели и слично е да се стекнат со работни навики и да добијат платено летување.
Кои квалитети треба да ги поседува лице кое сака да работи како аниматор?
Позитивен став и размислување
Ова е многу важно, бидејќи има контакт со секаков тип на гости, различни возрасти и треба да умее да се справи со секакви ситуации. Позитивниот став придонесува полесно да стапи во контакт и да ги забавува гостите. Една од најчестите поплаки на гостите во формулари за повратна информација во однос на услугата на тимот на аниматори е „не се смеат, како да ги мрзи да бидат со нас (гостите)„, „како роботи играат„, „многу се ладни и непристапни„ „децата не ги сакаат, бидејќи не им се интересни„.
Одлично познавање на англиски јазик
Секако во најголем дел од хотелите се бара познавање на англискиот јазик или друг, на пример грчки, германски или француски. Сепак тоа треба да биде на високо разговорно ниво, да може да се разберат желбите на гостите и да се остварува непречена комуникација.
Корисничка ориентираност
Секако дека голем дел од гостите се нетрпеливи и сакаат веднаш да добијат информација и да им се одговори на прашањето. Трпението и желбата да се услужи е секако голема вредност за секој аниматор. Замислете тие гости кои доаѓаат работеле напорно цела година и сега сакаат навистина да бидат во центарот на вашето внимание. Чувството дека сте тука да ги задоволите потребите, да им биде забавно, да вежбаат на плажа аеробик или да ги занимавате нивните деца е прекрасно и со сигурност ќе добиете одлична евалуација од секој гостин ако сте посветени.
Дали сте свесни колку работи учите во периодот додека работите како аниматор?
Вредноста на стекнатото искуство не се мери на никој начин. Тоа е нешто кое лично вам ќе ви помогне понатаму во градење на кариерата. Работните навики кои ги стекнувате, меѓу-културното разбирање и свеста за разлики и сличности, работа во тим и индивидуално докажување на професионално поле се дел од работите за кои вреди да одвоите едно лето и да се стекнете со дополнително искуство.
Aвтор: Автор: Афродита Кермичиева Пановска е основач и сопственик на тренинг центарот ЦС Глобал. За повеќе информации посетете го веб порталот http://www.csglobal.com.mk/.
Остави коментар