Овие закони, на едноставен начин ќе ви предочат како успешно да креирате или да го унапредите вашиот бренд и да ги избегнете опасностите кои ве очекуваат во текот на тој процес. Не заборавајте дека и самите вие, вашето име е своевиден бренд, така што овие закони се применливи и во најголемиот број ситуации од секојдневниот живот. Тие важат и во позиционирањето на вашата личност (вашиот имиџ) во однос на опкружувањето, така што вашето име, вашиот бренд да биде препознатлив и прифатен на позитивен начин.
Законот на ширењето
Јачината на брендот е обратнопропорционална со неговиот опсег.
Кога ќе се обидете на вашиот бренд да му придадете се со што се занимавате, тој ја губи својата јачина. Сите знаеме дека Мерцедес во свеста на купувачот е синоним за квалитетен автомобил. Што ќе се случи ако Застава од Крагуевац изјави дека ќе воведе линија луксузни автомобили од класата на Мерцедес? Да ги игнорираме нивните технички и организациски способности, но дали мислите дека некој би го купил луксузниот автомобил на Застава, па макар и да е идентичен по квалитет со оној на Германците. Се работи за позицијата во свеста на потрошувачот. Штом таа позиција ќе се изгради еднаш, Мерцедес си е Мерцедес, а Застава е Застава.
Кога, на времето, Нисан прв пат се обиде да произведува луксузни автомобили, го лансираше моделот “инфинити”, а никој на пазарот не знаеше дека е нивно производство. Дури откако јавноста се увери дека “инфинити” е луксузен автомобил од врвна класа почна да се објавува дека нивниот производител е Нисан, кој дотогаш важеше за успешен производител на мали економични автомобили. Ако се обидеше под постоечкиот бренд Нисан да “протне” нова марка луксузен автомобил (да кажеме “нисан делукс”) веројатно не би успеал, а притоа би ги повлекол во пропаст и веќе постоечкиот успешно изграден бренд, дотогаш синоним за мали, евтини, економични автомобили.
Законот на контракцијата
Брендот станува појак кога ќе го стесните неговиот фокус.
Успехот на брендот Најк (Nike) е врзан за нивниот првобитен фокус на мала група млада публика со јасно издиференцирани навики и однесување. Денес Најк продава сè и сешто, но само тесниот фокус на почетокот им овозможи да станат тоа што се – мегабренд. Синоним за нивниот бренд и понатаму е специфичниот модел на спортски патики.
Ќе се запрашате зошто е толку важен тесниот фокус, кога најголемиот дел од светските брендови денес продаваат сè и сешто? Тие го прават тоа за да ја зголемат вкупната заработувачка, но со тоа свесно го изложуваат на опасност својот постоечки бренд. Можеби подобар одговор е дека тие тоа го прават бидејки им се може т.е. можат да си го дозволат тоа.
Обидувајќи се да воспоставите свој сопствен бренд, веројатно не можете тоа да си го дозволите. Големите компании можат да си дозволат џетови, лимузини, летови со Конкорд… дали вие го можете тоа? За да станете успешни треба да копирате што правеле успешните луѓе пред да станат познати. Што е тоа што ги прославило на самиот почеток?
Не заборавајте дека во презаситената свест на купувачот има многу малку место, па за да се изборите за тоа место, потребно е вашиот производ да има извонредно јасна и едноставна симболика. Тој може да значи или едно или друго, но никако повеќе поими истовремено.
Законот на публицитетот
Раѓањето на брендот се постигнува со PR, не со реклама.
Порано, добар буџет за реклама беше доволен за да овозможи изградба и позиционирање на успешен бренд. Денес, во општеството предозирано од комуникации, тоа станува сè потешко. Интересно е дека нашиот локален пазар до неодамна беше во првобитната фаза за изградба на брендови, за што сведочеа вртоглавите рекламни кампањи на сега веќе популарните домашни брендови. Денес, со тоа што ќе креирате оригинална реклама и ќе се обидете на купувачот да му кажете дека вашиот производ е подобар и поевтин од постоечките брендови, нема да постигнете ама баш ништо. Прво, бидејќи е во прашање реклама во која самите себеси се фалите, не би ви верувале. Второ, дури и да ви поверува, просечниот купувач тешко би можел да го запамети вашето име. Едноставно, во неговата меморија нема повеќе место.
Единствено ако вашиот производ претставува некоја новост, нешто што би овозможило да се креира нова категорија во меморијата на купувачот, така што тој вашиот производ може да го меморира како нешто посебно и ново. Тоа може да се постигне само со моќта на публицитетот, при што некој од авторитетите, независно од вас, ќе ја објави таа новина (вест), која тогаш може да биде запаметена како ново име (бренд) во свеста на купувачот.
Законот на рекламирањето
Штом ќе се роди, брендот се одржува со реклама.
Најголемиот број познати светски брендови се родени преку “поплава” од публицитет. Мајкрософт (Microsoft) ја внесе револуцијата за користење на компјутери и ги приближи до обичниот човек. Можете да ја замислите лавината од публицитет што го следеше Мајкрософт во текот на првите години од подемот. Ним тогаш не им беше потребна реклама, бидејќи станаа мегакомпанија, почнувајќи практично од гаража. Денес рекламите на Мајкрософт се наоѓаат обично на најскапите страници на светските магазини.
Уште подобар е примерот на Ксерокс (Xerox), производител на машини за копирање. На почетокот беше светска сензација. Дури и во денешно време во Америка ќе чуете: Xerox me a copy” ( “Ксероксирајте” ми копија). Името Ксерокс стана синоним за фотокопирање. Но, денес машината за копирање не е повеќе вест, дури ни најспоредна вест. За да се зачува местото во презаситената свест на купувачот единствено решение е рекламирањето. Само толку колку да се освежи “зарѓаното” мемориско место. Да не се заборави дека ако сакате да фотокопирате, стариот Ксерокс сeуште е со вас.
Преземено од: Неделен магазин Капитал www.kapital.com.mk
Остави коментар