Многу компании губат контрола затоа што не знаат да ја организираат растечката количина на работа и со тоа ризикуваат пад на квалитетот и губење на клиентите. Треба да се знае кога да се застане и да се каже “не”.
Кога треба да се договори бизнис, односот со клиентот е идиличен. Ќе се нацртаат кога и да ви одговара. Бликаат од љубезност и услужливост. А, кога ќе договорите работа и ќе се разидете во бескрајната љубов, ви се чини дека сте телепортирани во паралелни случувања. Не одговараат на мејлови, не се јавуваат на телефон. И откако рокот на испорака поминал уште одамна, а вие сте ги загубиле нервите, драгоценото време и пари, се појавуваат без извинување, како ништо да не се случило. А, поголемиот број такви компании инстистираат на плаќање на дел или целиот износ однапред. Безброј пати е докажано правилото дека задоволниот клиент задоволството ќе го подели со три личности, а незадоволниот незадоволството со девет. Незадоволството во оваа формула е величина која што заради нечија непрофесионалност претставува изгубено драгоцено време, пари и нерви.
Пробивот на пазарот е клучен
На пример, никој не сака да му доцните со работата или да ја извршувате “фушерајски”, но истовремено многумина тоа им го прават на другите и тоа многу често, пресметано и намерно. Непрофесионалното однесување на многумина е стандард, а на ниво на фикција е ситуација во која клиентот пронаоѓа фирма со која може да работи според правила на здравиот разум. Да се знае да се направи производ не е доволно. Затоа, многумина се согласуваат, добрата последица на рецесијата што е во тек, е што бројни лоши компании пропаднаа. Но, проблемот е што многу фирми заради неразвиеноста на пазарот и понатаму работат на ист начин – непрофесионално. Еден од вообичаените примери е компанијата да тргне добро, работи навреме и квалитетно, а односот кон клиентите е беспрекорен. Потоа почнува да се пробива на пазарот, работа има сe повеќе и почнува неконтролирано да расте. Но, освен тоа што неконтролираниот раст е опасен, тој е всушност и пресвртница: или во насока на пропаст или во насока на учење.
Купувачите помнат и не простуваат
Многу фирми почнале да губат контрола затоа што не знаат да ја организираат растечката количина на обврски, а од друга страна ниедна работа не сакаат да ја одбијат, односно се однесуваат како од почетокот на текстов. Но, ако знаете дека по ниедна вселенска теорија нема да стигнете да ја завршите работата како што сте договориле со клиентот и сте му ветиле, најмалку што може да сторите е љубезно да му објасните и да му се извините. Не е ли тоа основно правило на цивилизирана комуникација? Кога му доцните на пријателот на договореното кафе, му се јавувате или му праќате СМС, па зошто тоа би било поинаку ако му доцните на клиентот со испорака на работата? Ако гледате дека нема да стигнете со работата, напишите му мејл на клиентот, образложете ја ситуацијата, замолете го за разбирање, извинете се.
Правила за фер-плеј
1. Ако настапат тешкотии во постигнувањето на роковите, за тоа предупредете го клиентот навреме
2. Никогаш не прекинувајте ја комуникацијата со клиентот, извинете се за доцнењето
3. Надоместете ја штетата на купувачот предизвикана од доцнењето со зададените рокови, преку попуст или подарок
4. Ако не стигнувате да завршите некоја работа, клиентот испратете го кај квалитетна конкурентска компанија
5. Останете со клиентот во контакт. Не значи дека конкуренцијата го придобила засекогаш
6. Ако не сте стручни да завршите некоја работа или немате време, одбијте го клиентот
Преземено од: Неделен магазин Капитал www.kapital.com.mk
Остави коментар