Денешниот потрошувач добива меѓу 600 и 3.000 рекламни пораки во текот на еден ден. Истражувањата покажуваат дека луѓето сè помалку им веруваат на рекламите што ги пласираат големите компании. Од друга страна, Buzz-маркетингот е потполно различен. Тој ве вовлекува и околу вас создава мрежа на пријатели и врски
Стручњаците за маркетинг почнуваат да ја уважуваат вистината дека луѓето полесно веруваат во приказна што се пренесува од уста до уста, отколку во формалните канали на промоција. Од друга страна, маркетингот е неизбежен посредник кој по пат на медиумите ги поврзува произведувачите и потрошувачите. Тајната е во поврзувањето на двата начини на комуникација. Еден синџир мексикански ресторани во Америка ја препозна предноста на Buzz-маркетингот во однос на класичните маркетиншки кампањи што ги користат останатите синџири за брза храна. При отворањето на својот нов ресторан во Њујорк, промоцијата ја засновале на делење бесплатна храна на улица. На тој начин во текот на само еден ден добиле 6.000 нови портпароли, и тоа по цена пониска од цената на еден платен оглас во весниците. “Можевме истите пари да ги потрошиме на оглас во Њујорк тајмс, но, немаше да имаме толку луѓе кои би зборувале за нашата вкусна храна”, вели директорот за маркетинг на мексиканскиот ресторан.
Од уста на уста
”Word of mouth” (од уста на уста) е називот за пренесување информации по устен пат, во вид на посебни препораки во неформални односи еден на еден. За ваков вид комуникација првенствено се подразбира директен, устен однос. Иако денес и телефонскиот разговор, СМС-пораките и веб-дијалозите, како што се онлајн-профили, блогови, инстант-пораки и мејлови, се вбројуваат во оваа техника, Buzz-маркетингот е вид маркетиншка техника што се обидува да го прикаже секој контакт со потрошувачите како единствена, спонтана, лична размена на информации, наместо маркетинг креиран од страна на професионалци. Историски, Buzz-кампањите по својата природа се креирани како театрални. Праќачот открива информации за производот или услугата и ги праќа само на неколку одбрани поединци во целната група. Во таа ситуација намерно се бараат оние личности што имаат влијание на своето опкружување. Buzz-маркетингот го креираат софистицираните компании во чии рамки корисниците се поласкани од тоа што се вклучени во елитната група на “оние што знаат” и доброволно ја шират приказната на своите пријатели и колеги. Целта е да се пронајдат поединци што имаат авторитет и голем број врски. Се верува дека оваа информација комуницира со дополнителен елемент – доверба. Истражувањата покажуваат дека ваквиот вид комуникација посилно ги поврзува луѓето затоа што примачот на пораката верува дека испраќачот зборува искрено и нема никакви скриени мотиви.
Трендсетери
Веќе на сите им е познато дека одредени скапи марки часовници, торби, автомобили и сл., им се подаруваат на градските трендсетери како би ги покажувале на сите популарни места во градот. Потоа нив ги копираат сите оние кои сакаат да бидат во тренд и да не заостануваат зад своите идоли. Ваквиот вид промоција стана бизнис и за многу славни личности, кои за своето појавување на промоции на нови клубови, кафулиња и ресторани наплаќаат и по неколку стотици илјади евра. “Парис Хилтон на отворање на дискотека!” е најдобра реклама, што не е бесплатна, но, сепак, чини помалку од високобуџетниот ТВ-спот на сите популарни телевизии.
Така, и по клубовите на Балканот може да се видат промотори или бренд-амбасадори кои ќе ве поканат на разни случувања во клубовите. Тие пијат одредени пијалаци и пушат одредени цигари, ве зачленуваат во клубот на пријатели, делат VIP-покани, а сè со цел создавање база на податоци или промоција на нов бренд. Се очекува ваквиот принцип што досега е применуван кај младата урбана популација да се пренесе и во деловниот свет. Регрутирањето личности што ќе пуштаат ”buzz” на терените за голф или во спа-центрите за одредени финансиски услуги, инвестициски и пензиски фондови, или осигурителни пакети, може да бидат добар потег.
Преземено од: Неделен магазин Капитал www.kapital.com.mk
Остави коментар