Во теоријата на комуникациите, PR-от (Public Relations – Односи со Јавноста) сè уште се соочува со идентитетски проблеми од типот како точно да се дефинира фокусот, целта и дејноста на оваа бранша. Земајќи го предвид широкиот спектар на теми и полиња во кои оваа дејност се имплементира, лиферувањето прецизна и финална дефиниција сè уште претставува тешкотија. Сите досегашни обиди за финализирање на истата не постигнале консензус, а нивната најголема критика е поврзана со аплицирањето на ефектите од оваа бранша како основа за нејзиното дефинирање. Сепак една од најцитираните дефиниции пред сè во светот на академијата е онаа на Denny Griswold. Во слободен превод, „Public relations е функција на менаџментот која ги евалуира јавните ставови, ги идентификува полисите и процедурите од јавен интерес на една индивидуа или организација и планира и изработува акциони програми кои водат кон јавно прифаќање и разбирање на понуденото.“
Како и секоја друга бранша, и Односите со јавноста дополнително беа погодени во информатичкото доба, а револуционерната улога на World Wide Web-от сè повеќе зазема замав и во оваа дејност. Имено, иако интернетот за многумина сè уште претставува комплицирана технологија која ги промени начините на одвивање на комуникацијата, факт е дека тој наметна поголема транспарентност, разноликост, но и директност во комуникацијата.
Во тој поглед, таканаречениот PR 2.0 има две карактеристики. Првата се манифестира преку применување на најдобра пракса. Најдобрата пракса дозволува консументите да го перцепираат понудениот продукт онака како што индивидуата или компанијата посакува да биде виден. Додека втората се аплицира преку континуирано реевалуирање и ажурирање на информациите и преку еволуционо применување на дијалог помеѓу потрошувачите и публиката со компаниите преку onlinе комуникациските канали.
Во рамките на дигиталниот PR, како најзначајни активности и канали за имплементирање на најдобрата пракса, агенциите ги препознаваат следниве:
1. Креирање на виртуелна бренд заедница и
2. PR 2.0, кој опфаќа директни активности во виртуелната заедницата, креирање и објавување на новостите и советување преку новите општествени медиуми.
Примената на различни методи преку ефективни дигитални PR стратегии не само што овозможува промоција на производи, туку и сериозно придонесува за подобрување на корпоративниот углед на компанијата.
Консеквентно, сè поочигледен станува фактот дека социјалното вмрежување преминува во еден од најпрактичните начини на примена на PR-от во информатичкото општество. Имено, општествените групи нудат опција за подобрување, позиционирање и/или зацврстување на корпоративниот углед на организацијата и фирмата, преку проширување на своите активности и врз животната средина. При тоа корпорациите влијаат врз креирањето на колективната перцепција во нивната виртуелна бренд заедница.
Еден од најетаблираните брендови кој со децении успешно работи на пазарот и претставува релевантен пример за аплицирање на PR 2 e Nokia. Оваа фирма иницираше серија од активности поврзани со највлијателните блогови, но и преку сопствен блог се отвори кон својата публика.
Во својата кампања „connecting people” Nokia агресивно ја зголемува cyber заедницата при што интерактивно ги користи новите медиуми со цел ефективно и брзо да стигне до поголем број на ентузијасти, корисници на мобилни телефони. На просторот од својата Facebook група покрај активно имплементирање на маркетинг, Nokia дозволува учество во наградни игри, додека динамичното ажурирање на новитети дополнително ја ангажира cyber публиката да оценува и коментира.
Една од придобивките на новите медиуми е и транспарентното пласирање на активности поврзани со животната средина. Со организирање на разни акции како што е на пример „отвори УНИЦЕФ разгледница“ Nokia вложува во образованието на неразвиените подрачја. При тоа со секоја отворена карта Nokia донира сума на пари за подобрување на образованието во Африка. Донираната сума се објавува и јавно, со што Nokia го гради својот позитивен корпоративен углед, но и корпоративен имиџ како фирма која не е заинтересирана само за профит, туку е засегната и од разни општествени проблеми и придонесува за нивно надминување.
Nokia го користи LinkedIn да ги информира своите корисници на оваа мрежа за настаните кои ги организира. Flicker и Nokia ги обединија своите сили при што Nokia консументите ги публикуваат своите визуелни искуства и активно се инволвираат преку давање коментари и сл. И уште, Nokia повторно преку мотото „connecting people” поврзува луѓе преку општествената мрежа Xing.
Значи мудрото користење на Facebook, LinkedIn, Flicker и Xing освен што ја подобрува, позиционира и зацврстува корпоративната репутација и имиџ на оваа компанија, истовремено овие таканаречени алтернативни алатки за комуницирање и помагаат на креативен начин да допре до своите потрошувачи. Притоа Nokia го поттикнува развојот на креативниот капитал на своите вработени и континуирано, активно и динамично ја инволвира својата виртуелна публика.
Aвтор: Марија Мојсоска е овластен соработник на Синергија Плус – Прва Агенција за финансиска писменост во Македонија. За повеќе информации за како помудро со личните финансии посетете го веб порталот на http://www.sinergijaplus.com/
Остави коментар